六和冰室

Open Now

Now Closed

【荃灣區】【六和冰室】自己都知自己性格上一直都好吸啲叔叔伯伯，國際通用，偏偏就唔係吸後生女，真係吹漲。今日又係被個叔父輩同事細豬哥約出嚟食飯吹水，次次都係咁。其實我個人最想嘅，當然係可以同女同事食飯，可惜時不利兮，唉。有時都幾慨歎於自己嘅內在同外在都完全無辦法吸引其他人，咁樣講其實幾灰。換個角度諗，吸引到啲叔叔伯伯都起碼 R 到水吹先，就好似今次特登走到入荃灣陪同事下午茶，都證明自己有人約先，雖然只係約去茶餐廳吹水。我就食 $55 嘅常餐「香煎牛扒公仔麵」，佢特別嘅位係配菜係「櫻花蝦炒蛋」同「牛油丹麥多士」，食落都有啲特別，同平時就咁食牛乳炒蛋比就約略多咗些少鮮味咁，幾得意。嘢飲我加 $3 飲「凍檸茶」走甜，味道係正常嘅。而細豬哥就叫 $54 嘅下午茶「公司三文治」，佢食唔晒畀咗件我食，質素唔差但價錢有啲貴，唔似下午茶公司治價錢。佢都係飲凍飲，加 $3 飲「凍奶茶」少少甜，見佢都飲晒應該唔差。張單佢攞咗去，埋單我係唔知幾錢嘅。。。（地址：荃灣青山公路144-172號荃豐中心地下A80-84號舖）#1amfoodie #foodie #hkfoodie #thatfoodiething