羅麥記 (青衣城1) (Closed)

【葵青區】【羅麥記】去完臺灣返香港，搭機場快線期間有啲肚餓，咁就喺青衣站落車睇吓有咩食。呢個時候我就記得我曾經喺好耐之前想食呢間羅麥記，但係被青衣城豐澤一個老女人收銀員耽誤咗我接近一個鐘。雖然我都為佢送上咗一封幾百字投訴信，但係啲時間都畀唔返我。隔咗咁耐嘅呢一刻，呢間羅麥記居然仲喺度生存緊。咁既然有呢個機會，我就當然要好好把握啦。入到去發現佢係玩港式情懷嘅，貼咗好多香港電影角色嘅畫作喺度，幾好。而食物方面亦都有好多港式食物，我唔想當佢普通茶記咁處理，就食鐵板扒餐啦。叫咗 $118 嘅「羅麥雜扒餐」，有豬扒、牛扒、雞扒、司華力腸、煙肉、薯條，配埋餐湯同餐飲。個餐都幾大份，食到我都非常之飽，睇開我嘅讀者都知我都好少講餐廳食物份量係多嘅，今次呢間就係喇。味道方面就還可以啦，呢個價有咁大份都唔要求啲乜。餐飲我配熱「香滑奶茶」，味道以茶餐廳嚟講都算中上，唔錯。坐咗陣，落一落格，就用第二個胃食埋 $48 嘅「火車頭雪糕」，用 Oreo 夾住三色雪糕加條朱古力蛋卷，唔錯。佢哋講到係七十年代小朋友最期待嘅甜品，我嗰陣年紀大唔知。埋單 $166，唔算貴。。。（地址：青衣青敬路31-33號青衣城一 2樓2