東興食品公司

Open Now

Now Closed

第一次經過時，俾一袋袋嘅炸魚皮吸引住，心諗呢間嘢自己整魚蛋，啲魚皮應該唔會差得去邊。當時見到4~5個人排隊買嘢。第二次經過時，仍然有4~5個人排隊買嘢。心諗咁犀利嘅，keep住有人排隊幫襯。第三次經過時，又有5~6個人排緊隊。再一次心諗，呢間嘢應該係好嘢嚟，唔係點會唔同時段都有人排隊。最後，除咗買咗半斤「炸魚皮」（$38），另外再買多半斤「頂級魚蛋」（$50），同埋4兩「超級魚片頭」（$20）。炸魚皮，又大塊，又薄片（比坊間少粉），超脆超鬆化，又有魚味，除咗打邊爐，當零食都一流。頂級魚蛋，係用新鮮魚打的（「超級魚蛋」就係用冰鮮什魚），差廿蚊，咁梗係試頂級啦。半斤有18粒。超級彈牙爽口，但魚味冇預期中咁出，但絕對係好食嘅。超級魚片頭，4兩有9件，同樣好彈牙，味道正常。