富臨薈 (Closed)

今日佛誕，港鐵做緊全線半價嘅優惠，所以有幾遠去幾遠！媽咪想食乳鴿，就咁係網上搜尋沙田乳鴿就見到哩個$29.8一隻嘅抵食燒乳鴿。臨出閘之前，打電話問一問個優惠仲有冇做先，同埋洗唔洗book檯，確認好就可以出閘！沙田A3出口其實唔係真係出口，入左新城市廣場之後，係右邊一道側門，通過一條走廊過去偉華中心，經過炑八前行就係富臨薈。環境唔錯，有d似新式嘅點心餐廳，見到有一籠精緻嘅點心鳥籠。坐底都係好似點點心咁有點心紙比你剔，茶用金色茶壺，不過小心熱，因為係金屬，掂到茶壺面會辣親。我地兩個人叫左兩隻乳鴿，每人限買一隻。多肉多汁，不過媽咪覺得可以再炸耐d等佢香脆d，但係$30黎講真係抵！見到檯檯都必食！另外叫左樽1664啤酒送。砵仔豬油撈飯係懷舊之選，勾起媽咪嘅回憶，熱辣辣係砵仔度剛剛蒸好，配上一小碗豉油。油分夠多，但係略嫌豬油味唔夠，不過都算好味嘅。最後叫多左個炸豆腐小食，夠熱，皮夠脆，粉漿裡面仲有d黑芝麻，咬落好香，係有少少唔夠鹹，當小食送啤酒都可以。