舍 (Closed)

依間位於IFC百貨公司入面嘅中式點心餐廳，睇落去好似好高檔，屋企人之前誤打誤撞去左飲野，發現其實佢個價錢都幾合理。今日晏晝我哋一家人出嚟中環飲茶，就揀咗嚟依間。因為我哋遲咗book位，book唔到入面位，但係坐出邊，反而仲好，因為海景好正。今日有少少大風，不過好在冇落雨，唔係就比較麻煩。一家人研究左一輪之後嗌左幾味點心，一個炒麵，同埋菠蘿咕嚕肉。幾味點心，有擦左金嘅蝦餃，外表好靚，味道ＯＫ。仲有粉果、燒賣、子薑牛肉球等等，仲有個炒麵，全部都ＯＫ好食。菠蘿咕嚕肉係新鮮做，用上新鮮嘅菠蘿，炒得熱辣辣，肉排新鮮炸，皮好脆，個汁掛得岩岩好，兩老食得好高興。全家人一面食一面欣賞下維港景色，慢慢歎，食得幾滿意。都算比一般酒樓貴一點，都係物有所值。