光榮冰室 (厚福街) (Closed)

晚市重開的第一餐，好多嘢都想食，煲仔飯、沙牛麵⋯⋯之前睇「沙嗲牛肉麵關注組」，有幾多人推介過「光榮冰室」，咁啱佢又有煲仔飯，加上呢度唔駛嘟安心碼，填資料就得，所以就敲定目的地。坐低好快就點左餐，不過想要的鹹魚肉餅飯因為賣晒肉餅（只係8點左右），而改食豉汁排骨。先來的係常餐（$45），有牛油多士、火腿煎雙蛋、叉燒湯意粉同飲品，我轉左沙嗲牛肉同要丁麵（免費轉）。沙嗲牛肉分量都唔少，有差不多十塊，好腍，只係一兩塊有啲筋，沙嗲都好濃郁，少少甜，如果辣辣地會好啲，花生味都有少少。丁麵唔駛多講一定好食，不過因為個湯濃味掩蓋左沙嗲香，下次應該叫普通麵試真啲。至於個煎蛋雖然有燶邊，但都係太乾。煲仔飯落單後要差不多等半個鐘先上枱，豉汁排骨煲仔飯（$68）大概有十舊排骨，有豉汁香但唔鹹，排骨亦唔會乾柴，另加臘腸（$15），油潤下飯。甜豉油唔錯，飯焦香脆，燶度剛好。坐低咁耐，不斷聽到好多嘢售罄，除左我個肉餅冇，食客A叫叉燒蛋飯，侍應「叉燒賣晒喎」；B叫蔥油雞扒飯，「雞扒賣晒」；C叫橙茶，「賣晒喇」，好似聽緊麥兜同伙記對話咁。所以有心食的最好都係早點來。