妹記大排檔 (Moved) New Location

9月又到re-u既時間!!今次同班fd去尖沙咀既妹記大排檔食飯，因為之前book左位，所以一去到就有位坐。可能因為就黎打八號風球既關係，雖然個時7點幾，但入面仲有好幾枱冇人坐，但聽我個fd講，平時如果冇book位既話通常都要等位。餐牌上面都係D普通大排檔可以叫既野食，不過妹記最特別既地方莫過於佢地用黎裝啤酒既「戰鬥碗」。當我地仲思索緊隻「戰鬥碗」有咩用既時候，有個侍應專登行過黎強調隻「戰鬥碗」只係用黎裝酒，別無他用。唔知係咪個名既關係，用呢隻「戰鬥碗」飲啤酒特別爽。我地叫左炸豬手、小炒王、通菜煲同煎蠔餅。落完單5分鐘後就上齊哂餸，效率好高!!值得一讚個人認為四樣餸之中最好食係小炒皇。佢有韭菜、魷魚、銀魚、腰果、蝦乾、帶子同筍，食材豐富得黎又唔會太油太鹹，能夠保留住每種食材既鮮味，真係一流。炸豬手D肉都炸到啱啱好，唔會太難咬。但係蠔餅就記住熱食哂佢啦，因為凍左之後食味道就一般啦。通菜煲不過不失，味道正常，想叫樣菜食既不妨一試。總括黎講，妹記食物味道唔錯，上菜效率高，而且可以係有冷氣既情況下食到大排檔既餸，真係不失為一班friend吹水聚舊既好地方。