一龍蝦兩餸王

Open Now

Now Closed

兩餸飯以前俾人嘅感覺係窮人糧尾恩物，但今時今日嘅兩餸飯真係唔講得笑，分分鐘要出咗糧先食得起。之前見人介紹過呢間一龍蝦兩餸王，咁啱今日喺隔離街買法式布甸，就順道嚟幫襯下呢間名貴兩餸飯。好彩今日嚟到，時間尚早，仲有齊龍蝦、鮑魚、蒸扇貝，聽講一晏咗就會賣晒。另外仲有其他家常菜，賣相都相當吸引。因為今日屋企冇煤氣，阿媽話煮唔到餸，所以佢就負責準備白飯，我就負責加餸。第一次食兩餸飯係有龍蝦伊麵，味道完全有中式酒樓嘅級數，半邊龍蝦夠新鮮，肉質非常彈牙，而且算係幾好肉，而伊麵就用龍蝦汁燴過，非常夠味。蒜蓉蒸扇貝嘅粉絲超多而且又夠入味，扇貝都好新鮮，加埋蒜蓉真係夠晒惹味。蒸鮑魚就帶有淡淡的陳皮香，同埋佢呢隻鮑魚都算係幾大隻，非常彈牙。除咗豪食海鮮，當然都要食吓家常菜。鎮江骨味道調得啱啱好，而且排骨都相當嫩滑唔嚡口。梅菜扣肉撈飯就最一流，佢相對地冇咁多肥肉，食起嚟都健康啲。呢間一龍蝦兩餸王真係非常精彩，感覺簡直好似去咗中式酒樓一樣，下個月出糧一定會再去過。