戀茶舍 (兼善里) (Closed)

依家啲茶飲店真喺越開越多，開到比7仔仲多，梗有一間喺左近，早幾日就喺落去順寧道跟親友交收，回程時路經昌華街，見到一家新嘅茶飲店「戀茶舍 」，睇睇啲價錢，跟一般大多數嘅茶飲店都平啲啲，貪新鮮就試吓先。 望入去唔止人手多，而且，裡面嘅製作環境都好乾淨企理，全開放式都唔怕被你睇到佢哋點整。飲品選擇方面，如大多數嘅茶飲店，都喺好多元化，而配合番店名，分咗8大系列，都喺啲同愛情中嘅唔同經歷，都幾有心思，有啲睇落都會會心微笑。 阿華田波波沙冰 $33 珍珠奶茶飲得多，珍珠華田未試過，華田仲要喺做成沙冰，就算唔方便邊行邊飲，晌鋪外先啜番幾啖降降溫，感覺已經好唔同，成個人爽晒。啲華田沖得好濃郁，珍珠又有咬口，做得有誠意。加上專登沖到有啲斑紋，賣相又靚仔好多。熊貓蛋糕奶茶 $26呢杯奶茶喺唔會有「熊貓」嘅相關元素，更加無蛋糕晌裡面，睇埋佢英文譯名，就知喺奧利奧餅乾加奶茶嘅組合而已，以奧利奧餅乾碎混入蛋糕忌廉，再倒入去奶茶度。故此，入口嘅口感有啲似奶昔，茶味都幾香濃，又有少少餅碎口感，整體感覺又幾得意。 依家啲茶飲店開到成行成市，真喺想突圍，都要搞啲特色嘢，今次所試嘅都喺之前未飲過，感覺都有啲賣點。