台灣客棧 (同德大廈) (Closed)

搭車經過見到新開張無耐嘅呢間「台灣客棧」， 今日終於有機會同朋友過嚟試一試佢！ 揀咗下午茶時段黎食，無嘜客！食物質素都唔似係台灣料理，有少少失望🤭兩個人叫咗兩款台式乾拌麵，分別係滷豬軟骨乾拌麵 & 鹹酥雞扒乾拌麵；另外跟餐飲品半價，叫咗一杯烏梅蜜茶&一杯蜂蜜蘆薈～呢兩碗乾拌麵我相信都係即叫即做嘅但係個乾拌麵真係麻麻地，麵條質感太過淋，冇嘜口感！之後發現佢哋係用壽桃牌台式刀削麵😓😓 咁樣成件事就已經錯晒啦，根本就唔係台灣乾拌麵，而我相信佢個拌麵辣醬都係壽桃牌刀削麵入面跟住個包黎～ 至於個豬軟骨， 份量係多嘅，食落都夠淋嘅，不過我都只係覺得係車仔麵質素姐～嗰個鹹酥雞亦都係不過不失嘅，食得出係新鮮炸，雞肉亦都滑嘅，會始終唔係台灣鹽酥雞嘅感覺🥲 每碗乾拌麵入邊有一塊豆腐乾，滷水蛋，同幾條生菜🥬 豆腐乾同滷水蛋都好淺色亦都食唔到滷水味，麻麻哋！兩杯飲品我諗都係糖漿溝，唔會難飲但亦都唔會話好好飲～整體來講呢一間台灣客棧食唔出台灣風味，普普通通啦🤭