樂面牛屋 (Closed)

之前去開禮頓道果頭覓食, 發現原來呢頭好多餐廳, 所以今日次去睇睇有咩好食。呢間樂面牛屋因為處於轉角位, 所以人流好旺。見佢有咁多捧場客, 而我咁岩都想食台灣野, 於是就入去試下。餐廳唔算大, 座位唔算多。我入到餐廳坐低左先發現原來店外的客人係等緊外賣的 (因為外賣自取有8折) , 早知我都叫外賣啦😅麻醬雞絲乾麵 ($62)上枱時覺得成碗都都好Dry, 因為蘿蔔絲, 青瓜絲, 雞絲同埋D麵都係無汁的。但原來一翻開D麵, 下面有超級多的麻醬, 足夠將所有材料都沾滿麻醬。麵身似烏冬, 但食落似上海麵, 感覺似兩者既混合體。配料爽口, 雞肉味都唔錯, 唯獨對於個麻醬, 我覺得芝麻味同花生味太重, 完全搶了配料的味道。一開頭食既時候會覺得好濃郁好好味, 但因為佢好稠身加上重味, 食到最後會有D漏, 同埋好似漿住個口咁, 所以整體黎講只屬一般。熱珍珠奶茶呢杯珍珠奶茶好甜, 係台灣飲品既味道呀! 珍珠細細粒, 好有咬口, 而且落既份量都幾多, 我一路飲, 一路”不”珍珠黎食, 去到最尾都仲有珍珠剩低。