正斗粥麵專家 (國際金融中心商場)

Open Now

Now Closed

是日感冒未清, 想食清淡點同坐得舒服點, 來到正斗ifc店, 睇下餐牌, 好似好多野食選擇, 除左無奶茶咖啡三文治外, 本地粥粉麵飯腸粉甚至連小菜...糖水, 點心都有, 真誇張!!, 我諗外國遊客一定歡迎同受落呢粒米芝蓮星星我叫左一碗及第粥($38), 先食一啖粥, 熱辣辣而且粥底亦好綿唔稀, 都算幾滑, 但粥有少許味精的影子, 材料都幾豐富, 有自家手打肉丸兩粒, 好新鮮而且味道亦佳, 幾片豬潤同一片豬腰, 經加工後爽口但已無甚鮮味, 雖然及第粥大家都已知道係有豬內臟, 但自問見識少, 從未食過及第粥有生腸(即雌性豬隻的生殖器官), 仲要有四件, 爽口無鮮味, 敗北之物, 我諗呢碗粥都係可能適合外國遊客食, 但我就情願用返粉腸會好好多, 下次都係去番羅富記甚至係遠d的生記, 起碼傳統同正路d另點了蘿蔔糕($25), 呢個竟然有驚喜, 三片蘿蔔糕厚度適中, 因為太薄會無咬口而太厚煎唔透, 而佢地的卻煎得剛剛好, 脆口得來又唔會好燶, 當中有唔少蘿蔔絲, 亦唔會太多粉, 蘿蔔味都頗濃, 加一點辣椒醬都幾惹味, 佢地的辣椒醬唔會太咸, 而且蒜香同辣味平衡得好, 唔知係自家製定來貨呢??!