獨當一麵 (Closed)

行去元朗搵野食，行經呢間食麵店，睇下門口個牌寫住 ( 胡椒豬肚雞腳豬骨湯麵 )，嘩！我至愛既胡椒豬肚湯喎，咪入去試下囉。當時下午三點幾，店舖唔大，大約有十張八張台，無咩人。坐底第一時間望下胡椒豬肚雞腳豬骨湯麵價錢，$48！唔平喎，胡椒豬肚湯飲得多，但用來麵食就未試過，甚都要試架！先來一杯下午茶送既豆漿，有豆香味喎，好滑香，正呀！胡椒豬肚雞腳豬骨湯麵，我要左上海粗麵，但要加 $3 ，湯底有分４種辣，( o下！咩胡椒湯有得揀辣架咩？唔係一煲過架咩？）個伙記話，係豬骨湯底加上客人要求既胡椒辣度做既，一聽就立刻失望啦，我想要既係胡椒湯呀！唔係加上去果種！咁第一時間飲下個湯先啦，有胡椒味，但更有好重既豬骨湯味，麵彈牙，算唔錯，有兩隻煲到淋晒，滑滑的，都算新鮮，入口即溶既雞腳，有一舊豬骨，多條軟硬適中而有香味既豬肚，除左湯底令我失望之外，整體都唔算差！沙薑雞，雞肉都新鮮既，但無沙薑味，若然唔當係沙薑雞，當係普通蒸雞，都好好味既！重有下午茶送既一條春卷，內裏只有紅蘿白絲，棷菜絲，即係素春卷，只係脆口無咩香味！埋單 $51