彩逸皇宮

Open Now

Now Closed

平時同屋企人喺度飲茶就飲得多，晚飯真係第一次，呢日媽咪話唔想煮所以即興黎食小菜。一如其他連鎖酒樓，晚市價錢都偏貴，炒個菜都要八十幾，但都有啲優惠菜式，半隻片皮鴨$48。質量同價錢成正比，得八片，而且每片都得皮同肥膏，無乜肉，配料既蔥尚算新鮮唔會太辣口。粉皮煎得幾香，厚薄適中，口感可接受。+$48可以一式兩味，有得揀薑蔥爆鴨件或炒鴨絲，因為食得方便啲所以揀左後者。鴨絲份量足，韮菜新鮮唔鞋，炒得幾香口，但略嫌豆豉落多左味道鹹左啲。之前食過午市既橙蜜燒鱔覺得幾好食，見晚市有就點左呢味蜜餞鱔拼盤，幾豐富，有燒鱔、炸豆腐、腐皮同海蜇。海蜇爽口彈牙，醬汁甜而不漏，好惹味，反而腐皮一般般。鱔燒到岩岩好，搽上蜜糖表面燒到脆身，甜甜地好開胃，加上肉質滑而鮮美，油香足，整體口感好豐盈。炸豆腐炸到外脆內軟，豆腐口感唔散，仍然好堅挺，入口仍唔會好油膩。最抵食係呢個金菇肥牛煲，份量十足，粉絲同肥牛都好多，沙嗲亦唔會太鹹，唔洗送白飯都得。而且牛肉唔會太肥，每一塊薄得黎大大塊，食起黎好過癮。整體不過不失，都係正正常常酒樓野，無咩要求但求一餐飽肚既可以一試。