北正宗 (Moved) New Location

屋企附近開咗間新越南嘢，個名叫“北正宗”，Facebook話係北越正宗菜式。雖然我有啲怕响街食啲好平嘅牛肉，但要知道係咪地道，食鮮牛肉湯河先知。Lunch有set，加錢$10要埋個越南咖啡。一室的藍淺綠調子、盆栽擺設、木具傢俬，加上店子啲碗筷器皿簡潔乾淨，非常討好。個河粉其實唔係好正宗，但整體味道幾好。湯底清徹不油膩，但牛味稍淡不過冇味精，加埋啲洋蔥、九層塔、青檸汁、辣椒，湯底即時提升；河粉用咗南部嘅幼身粉；而且北部應該較少比九層塔、芽菜做配菜，但要讚的是材料新鮮，浸落湯夠香氣。牛肉出奇地雖然係切厚片但食落嫩口有牛味。嚿油炸鬼好實唔鬆化可以唔食。跟餐嘅越南咖啡好仔細咁用滴漏壺，而且店員見到漏完又主動收走，提我用匙羹拌勻啲煉奶先飲。飲落香味濃郁內酸味，不過啲煉奶好甜。雖然唔係正宗北越嘢，不過南越口味始終比較易被港人接受，而且比同區响商場嗰間水準又高一班，可以再嚟。