盛記盆菜&盛記麵家

Open Now

Now Closed

呢間餐廳好有老闆嘅個人風格，周圍都掛咗好多充滿特色嘅裝飾。出邊係屋村，但係餐廳就好似入咗去另一個世界，好鍾意咁特別嘅餐廳。呢度好多食物都係自家製，充滿特色，亦都好好食。服務更加係非常高質，店員服務細心，令我哋過咗一個好開心嘅晚上。晚市只有打邊爐，我哋嗌左鹹菜胡椒豬肚湯底，湯底非常足料，配料食極都唔完。好欣賞佢哋嘅象拔蚌刺身，非常鮮甜，切得厚薄適中。而餐廳獨有嘅蠔仔餃亦都好有特色，自家製果然唔同啲，充滿麻油香。呢兩樣嘢都係必食！另一樣嘢一定要食嘅就係手切肥牛，店員話例牌會瘦啲，而大嘅手切肥牛會比較肥美，我哋就揀咗瘦啲嘅例牌。亦都非常好食，本地牛肉充滿牛味，亦都切得厚薄適中！呢個自家製嘅響鈴亦都不得了，非常之新鮮，好香脆，但係又無一般坊間買到響鈴嘅油溢味！雖然好邪惡，但係吸收曬湯底嘅精華真係好好食。因為慶祝屋企人生日，我哋亦都嗌左壽包，店員仲好細心咁樣準備咗好可愛嘅熊仔蠟燭，好有heart。除咗食物出色之外，呢度嘅服務亦都係世界級嘅一流，所有店員都好attentive，有咩需要都會即刻幫到你。佢哋嘅服務態度好好，成個氛圍好開心。好想多謝佢哋，俾咗一個咁開心嘅晚上我同屋企人。