龍門冰室 (Closed)

之前同朋友兩個人去左龍門冰室食飯, 兩個人都叫左好多野食, 食到我地好飽, 而家再帶大家同我一齊回憶下啦!我同朋友都點左個忌廉粟米汁龍利柳撈丁配凍檸茶。職員送菜效率都幾快手, 好快就有得食又有得飲。凍檸茶一杯滿, 都有好多片檸檬, 飲得出有茶既甘香同檸檬既酸澀味, 檸檬茶果然係香港茶餐廳既偉大發明!我朋友就飲黑牛, 有好多茶餐廳同冰室都買少見少, 難得呢度有就一定要試下!忌廉粟米汁好濃, 忌廉味好突出, 粟米粒粒飽滿又香甜, 龍利柳都有兩塊, 都幾好味, 魚味都幾出色, 肉質都幾嫩, 值得一提就係呢個撈丁都配有幾多菜, 即食麵都幾彈牙, 唔會煮到過左火, 好似糊左咁, 所以就算撈左汁, 都可以保留一定口感!小食就點左蜜糖雞翼同韓式炸雞。蜜糖雞翼炸得好脆, 而且又相當入味, 出面蜜糖, 食落甜甜地, 幾好食!好少見到冰室有韓式炸雞食, 點都要試下, 送過黎見到都有好多件, 賣相同出面食既有D唔一樣, 食落香脆肉嫩, 少少辣辣地, 幾惹味, 裡面仲有好多肉汁, 估唔到都幾好食! 有D驚喜!總括而言, 呢度既食物種類有D特別同有創意, 同其他既冰室好唔一樣, 而且都好好味, 有驚喜!