桔梗 (Closed)

旺角缽蘭街一直係傳統紅燈區，但近期越來越多小店進駐，而呢間門面米白色，落地玻璃嘅日系餐廳就好吸睛。 走進餐廳，就好似去左一間悠閒coffee shop咁，兩層高嘅樓底，擺放疏落嘅木檯凳，墻邊裝飾櫃放滿精緻小擺設，加上輕鬆嘅音樂，營造出舒適恬靜嘅感覺，同出面嘅煩囂相映成趣。 餐點方面，本來想試下關西風壽喜燒套餐，可惜遇著禁晚市😣，就試下其他午市食物先。 ❤ 明太子鍋燒烏冬配炸吉列和牛（$168）吉列牛柳份量都唔少，而且比較厚，啖啖肉口感比較有嚼勁。烏冬彈牙，同明太子撈埋一齊幾鮮味。入面兩大塊腐皮索曬d汁，味道好香濃。 ❤ 桔梗和牛Combo（$158）包括日本A4黑毛和牛肉燥飯同溏心蛋，同埋兩件日本A4黑毛和牛三文治。成個set擺盤好靚，肉燥質感好鬆軟，而且多汁，撈日本米好開胃😋。三文治係正方形細細件咁，好易入口，中間炸和牛好厚身，五成熟軟硬度啱啱好，而且多士烘得好脆，非常香口👍。另外仲有兩碟醃蘿蔔，係酸酸甜甜嘅開胃小食。