鳴越越式料理

Open Now

Now Closed

來到德輔道中，走進一條小樓梯到達今晚嘅越式餐廳 - 鳴越。店內環境意外地寛闊，座位空間大。天氣咁熱，朋友二話不說點個清涼醒胃嘅撈檬。呢個撈檬有齊正宗檬粉必備嘅花生碎、炸乾蔥和蔥油等配料，唔好睇少呢啲配料呀，正正係佢地令成個檬粉食起來有多種層次。香煎豬扒、炸雞翼微燶，食落香口惹味，檬粉份量十足，加埋甜酸汁夠曬醒胃。越式粉麵之中最吸引我嘅唔係湯河，亦非撈檬，而係呢款以幼細米粉製成嘅濱海。一片片薄身網狀米粉，看上精緻，入口幼滑，以生菜包裹，配上豬頸肉，再蘸點越式甜酸汁，先夠完美。配菜香茅豬頸肉每一片都充滿油脂，口感爽脆，可惜豬頸肉溢出大量油份，令部份濱海變成油浸米粉。豬頸肉分開上就可以避免呢個問題啦。炸到金黃色的蔗蝦，一啖咬落，蝦肉十分彈牙爽口。食到中間滲出清甜蔗汁，好味呀。脆卜卜的蝦片，上面放著鬆軟的豬肉，加埋乾蔥和蔥油， 鬆、脆、鹹香一應俱全。記得趁熱食，放耐咗啲蝦片就淋晒架啦。