燈籠滷味 T.P.E. (M88) (Closed)

燈籠滷味近呢幾年都越嚟越開得多分店，仲要開係旺角大商場，其實我對新式潮州滷水的觀感麻麻地，覺得食潮州滷水野，首選一定係傳統打冷舖頭。不過上星期約左朋友係中環，想搵間舒服啲的可以傾計，所以最後揀左位於威靈頓廣場的燈籠滷味。首先裝潢都算幾特別，周圍都有台灣元素的海報同燈牌。而當中有個2人餐都幾抵食，包一款小食、一款前菜、芋圓冰同兩杯台式飲品，而主菜有6款滷水食材配麵，份量非常豐富，而價錢都係二百幾蚊，以晚飯價錢黎講都算幾抵食。食物質素方面，小食起司麻糬應該係現成急凍貨，但起碼出黎夠熱辣辣。前菜蔥抓蛋餅整得夠實，唔會一夾起就散亂，食落去都夠熱，食材組合及味道都唔錯。主菜滷水雖然用湯麵形式上枱，所以湯汁唔會好濃味，不過金錢肚同豬耳都入味，同時保持質感。不過蘿白、豆腐就唔夠入味，而滷水汁都相對單調，味道層次唔夠複雜。而最後飲品及甜品正常發揮。整體黎講，呢個二人餐份量同味道，再加上中環呢個地方，絕對係唔錯的選擇！