中環茶記 (Closed)

同朋友黎中環行街見餓，即刻見到呢間中環茶記，即刻充充飢先。我地叫左個唔係咁常見既可樂炆豬手。原來用可樂炆既豬手係會將可樂既香味滲左入豬手入面，而呢度炆豬手既火候都好夠，所以食落唔硬身，仲好juicy添。另外我地再叫多碟鹵水拼盤。入面有大腸啦，牛展同埋鵝翼，仲有芽菜墊底，份量都幾多，而且好香鹵水味。特別欣賞呢度既鵝翼，廚師將舊鵝翼切得更細，食起個陣要掉骨都方便左。因為全部都係肉既關係，我地特登再叫碟蠔油菜心黎中和返。由於菜心本身好甜，唔駛點落蠔油都好夠味。飲品方面，我地叫左杯紅豆冰同埋凍鹹擰蜜。杯紅豆冰既紅豆半呈沙狀，連埋花奶飲真係絕配。至於杯凍鹹檸蜜，飲完好潤喉，如果喉嚨不適可以一試。