Fang Fang (Closed)

今日約咗個朋友食午餐，由於大家都喺中環返工，自然喺中環搵餐廳啦。朋友介紹咗呢間係食中菜嘅。一出𨋢就見到間餐廳，門口行入去一路感受到餐廳嘅氣派加上現代感，同傳統嘅中餐廳好唔同，環境係好靚嘅，有啲高貴。見到餐牌有個$198嘅午市套餐，包前菜、點心、主菜同埋甜品，另外再可以點嘢飲。我同朋友兩個人，一人叫咗一款點心，分別係松露 雜菌素春卷、蝦餃皇配玫瑰櫻花蝦粉果。春卷切開成兩條，每人試啲好方便。外皮鬆脆，內餡料實在，食落好香口。至於另一款，就係由蝦組成。身為蝦迷嘅我自然會喜歡啦。前菜就點咗芝麻豆腐沙律。豆腐好滑身，唔算非常大碟，作為前菜係唔錯嘅選擇。沙律都幾新鮮，可以一試。中式安格斯牛仔柳，啲牛肉超級林，食落非常爽口，個汁係精華，賣相都好靚，有啲fusion嘅感覺，配埋個荷葉飯就一流。紅燒東坡肉係另一個主菜，一共有四件左右，隨碟仲有西蘭花。平時食東坡肉都驚肥，不過呢度啲東坡肉肥肉唔算好多。甜品方面，點咗十勝紅豆煎堆，同埋蛋白杏仁茶。出乎所料，原來煎堆仲有雪糕伴隨。杏仁茶蛋白味濃厚，作為結束一餐嘅甜品，係唔錯嘅選擇。