和牛燒肉一郎 (寶漢大廈) (Closed)

用App點餐，上餐速度都快手 ，唔會因為放題就拉布。但個爐係略細，兩個人share一爐會食100分鐘會少少趕。牛里脊肉油脂唔會好多，有牛味，因為唔會好薄身，咬落好有口感。牛肋肉大塊過手掌，差唔多cover哂佢個爐，但係薄到紙咁，好難燒到有焦香感。厚切同薄切牛舌都相當優秀，牛舌棒就食落怪怪地，燒要燒六面都需要啲心機。大部分牛都係走瘦得嚟但唔會覺得好乾嘅路線，食完唔會好膩。所有牛都會俾你揀鹽味同味噌，但講真真係食唔出…雞肉個白草汁唔錯，雞肉都滑。海鮮方面扇貝燒起真係好細粒，唔計內臟應該直徑得2 cm， 魷魚…嗯…細細粒都幾得意…我相信如果食貴Set海鮮就會相對多樣化同好少少。小食方面算不過不失，我食咗薯條同腸仔但應該無人想知佢地嘅事，個和牛肉燥可以配少少飯試下，係好食。嘢飲就都係普通汽水/冬瓜茶/茶，甜品有明治雪條。總結係適合唔鐘意太肥膩的人，佢主打嘅牛以咁嘅價錢係交足功課，其他海鮮小食飲品就當係點綴下不必太認真，算係不過不失。