K&L Dream Cafe (Closed)

是日沙律-柚子提子乾雜菜沙律用咗柚子肉同提子乾，Dressing亦用咗少少芒果汁，酸酸甜甜，唔係淨係普通俾堆菜你咁。是日湯-椰菜花忌廉湯(配蒜蓉包)係打到好smooth唔會食到粒粒嘅忌廉湯，而個蒜蓉包上面嘅蒜係唔多但我覺得啱啱好，唔會因為太多蒜而太鹹太重口味。挪威煙三文魚卡邦尼煙肉全蛋闊麵一嚟已經見到擺盤好吸引，一間細細餐廳但一啲都唔求其。全蛋闊麵唔會煮到淋patpat，煙肉非常夠，唔會食到最後得返啲麵。烤春雞松子仁白松露意大利飯呢個意大利飯係好推薦大家試，燒春雞上面舖咗少少嘅芝士，有啲鹹香，意大利飯乾濕控制得啱啱好，唔會濕過頭或者軟曬，面頭有烘過嘅松子仁，脆卜卜再加有蘆筍，夠曬豐富。水果茶(特別menu)有洛神花、蘋果、山渣等，因為2個set已經好飽，飲返杯酸酸地嘅熱茶感覺舒服好多。最後食完係超飽，份量係一啲都唔少，尤其係份沙律同意大利飯。另外個日有枱客人慶祝生日，有職員捧生日蛋糕之餘仲好細心咁播埋生日歌，想食生日飯又有質素嘅西餐，呢間絕對係一個好選擇啊。