伊賀日本燒肉料理 (Closed)

打風前嘅晚上，尖沙咀依舊人來人往。嚟到專門食日式燒嘅伊賀，完全感到放假前嘅興奮感到。呢度點菜單模式非常先進，唔係依賴傳統嘅紙筆落單，而係iPad 圖文並茂，一次過睇晒有咩想食，方便快捷。首先嚟到嘅日式刺身，三文魚魚油甚香，甜蝦鮮甜美味，而八爪魚爽口彈牙，係相當新鮮嘅選材。接著當然係肉食時間，提供嘅選擇非常之多，和牛粒係愛牛之人必點，牛肉雖然厚身，但嫩口非常；牛肩肉食得出帶有較爽勁嘅口感，唔需要多點調味，都食得出肉質鮮美嘅感覺；而火辣雞翼亦特別推介，辣味好入味，但又唔會辣都不能入口，夠晒過隱。燒海鮮主要用小碟承載住，方便控制溫度，燒大概15分鐘，蟶子，大蜆等等都熟透，而香草魚柳就更加快，10分鐘左右就食到香草味濃郁嘅魚柳喇！接著嘅炸物亦無令到我地失望，全部都即叫即炸，食落好香口。天婦羅脆漿夠薄，先食得出食材真正嘅味道。最吸引嘅係榴蓮炸彈，同炸綠茶雪糕，唔係間間餐廳都供應，一定要試。而壽司嘅款式亦都唔少，由火炙三文魚，到玻璃蝦壽司都一應供應，真係唔怕食唔飽。最後仲有貴價Movenpick雪糕，同埋任飲汽水，中意任食同款式多嘅，必然首選呢間。