最想吃 (Closed)

呢日同友人喺灣仔揾咗好耐食咩好，就揾到呢間ALL I WANA EAT，見佢有刺身、有雞煲(可以揀炸雞)，又有一人火煱，仲要係任食！岩哂我哋呢啲選擇困難症嘅人😹環境//呢間應該係新餐廳，人唔多，環境好舒服同乾淨，啲位好闊落，夠坐6人一齊打邊爐。食物//頭盤同刺身岩岩好係2人份量，我就好鐘意個雞肉串燒，個燒汁幾甜，配上雞肉醃得好入味同嫩滑，友人就大讚個蛋黃魚皮。刺身款冇得揀，不過全部都大路、種類多，我好怕魚生腥，但佢就冇乜腥味，還可以。雞煲同炸雞2揀1，我哋揀咗雞煲，仲會俾醬同辣椒粉俾你自己調節辣度，份量望落好少，不過後面仲有一人火煱，所以夠食。火煱湯底選擇都多，我哋分別叫咗麻辣同牛乳湯底，不得不讚啲牛肉、豬肉同海鮮料好靚，除咗可以落火煱，仲可以落喺加咗湯嘅雞煲度。真係一次過滿足哂所有願望。飲品//要特別提下，佢有一杯杯自家製嘅飲品，我試咗宇治金時，應該係抹茶、奶加綠豆，杯野飲好高質好好飲！整體//適合一班朋友聚嘅地方，咩都有得食，就唔洗夾來夾去，地方遠離塵囂，唔會好嘈。整體食物水平高，服務尚好，服務員會間中走來望下張枱有冇野收，係聚會嘅好地方！