芝加哥串燒酒場 (太和中心)

最近去咗大埔嘅「芝加哥串燒酒場」，環境輕鬆，天氣好的話有戶外坐，真係好適合約會。呢度串燒價錢相宜，最啱唔想破費但又想食好嘢嘅情侶！每日都有啤酒買一送一，無論係情侶定朋友，絕對係溝女好地方。今次我哋點咗好多串燒，首先風味燒雞腎串，口感爽脆，味道十足，真係開胃！燒士匪雞翼外脆內嫩，沾上特製醬汁，唔食唔得。明太子玉子燒滑溜可口，咬到入去啲明太子流出嚟。鹽燒牛舌心串，鹹香適中，肉質細膩；而風味羊肉串就帶有微微的香料味，令人陶醉。椒鹽薄燒白鱔串更是驚喜，鮮嫩得來又帶點脆口感。除了串燒，麻辣薯條辣得過癮，炸饅頭串更係令人懷念嘅小食。最後，招牌燒牛骨髓串，濃郁的肉香令我哋完全停唔到口。我哋仲叫咗好多好多串燒，全部都有番咁上下水準。大埔街坊夜晚想食串燒，或者啤一啤嘅不二之選！