太平館餐廳

Open Now

Now Closed

同老友慶祝生日，主角想食太平館的瑞士雞翼，我立即奉命去訂位。想不到星期一晚全場滿座，未過8點仲有不少人等位。其實我有好幾年無食過，裝修比以前光猛好多，好處就是影相清楚很多。一場來到，當然要叫齊招牌菜。由於只叫得三個主菜，所以只有三個餐包，雖然是普通的來貨餐包，不過夠地道，我們5個人一下子很快吃清。瑞士雞翼-用豉油、冰糖製的甜滷水汁，其實好多餐廳都食得到，不過勝在這裡夠老子號，特別加了幾分感情分。雞翼每隻也飽滿肥美，咬下去汁液立即四濺。煙倉魚-講到這味當然不及益新的，但價錢相比，這裡算不錯。外層深啡內裡雪白的魚肉，有著淡淡的煙燻香。岑味牛脷-要看看kc的食評，才知什麼是「岑味」。每塊厚厚的牛脷，入味非常，我嫌太腍，缺乏牛脷的煙韌彈牙口感。干炒牛河-可能河粉比一般特別深色，炒得很均勻，所以也特別夠味，而牛肉食不出梳打粉，但做到肉質好嫩滑，肉味又濃。蒜茸西蘭花-只是想食點蔬菜，不過做得幾爽身。雖然我鍾意食甜品，但對梳乎厘興趣不大，因為好似一陣風的，不夠實在，不過招牌菜，無可能不試。好像雲團的大大個，差點滿瀉而出，軟綿綿很鬆軟，而我反且欣賞周邊焗得又香又脆的蛋白。