華星冰室 (E-Max) (Closed)

今朝晨早流流帶小朋友黎九展參加數學比賽，送完佢地入課室當然要搵地方坐下過日晨，以為呢度係不毛之地冇野食啦，點知原來二樓已經發展成出一條食街，入面各式各樣食肆，真係唔愁無早餐食。其中有間華星冰室係灣仔出名係名明星飯堂，個炒蛋炒到遠近馳名，家陣唔洗過海就食得到，緊係要幫襯下。叫左個早晨套餐有炒蛋配厚多士，再加個火腿通。多士夠厚夠鬆軟有牛油香，通粉夠彈牙，最正係個炒蛋，有蛋香又滑！至於老婆個雞扒配米粉同樣有水準，雞扒香口又夠大塊，能夠响九展食到有水準的早餐，真係超級驚喜！