蠔門宴 (Closed)

去九龍城通常食泰菜，今日就試新野食刺身，餐廳位置都好易搵，門口有個醒目招牌，格局簡單有格調，有10張枱左右，6點半入左都已經有3-4枱客人，侍應非常有禮貌，亦好熱情招待我地。今日就簡左刺身試下，蠔就留番下次再食。黑毛豬串燒($38)豬肉香味十足，外皮燒得剛好，好夠油份，但唔會油膩感覺，肉塊厚身鬆軟，有咬口。金門刺身($198)本身以為得蠔食，原來餐廳都提供刺身選擇，點左一客最高級刺身，6款刺身各有2件，整體非常好，夠新鮮，解凍時間夠，每件份量都厚切。最突出係帶子刺身，值得一讚，餐廳用磨芥末，提升刺身鮮味。牛小排($138)一向對燒肉情有獨鍾，今次呢道菜有85分，牛肉外層剛剛好熟，內層唔會熟透保持粉紅色，肉質嫩口，旁邊配有醬汁，個人認為唔沾醬都非常夠味。