悅翠小廚 (Closed)

星期六睇三點三既戲，但起身已經一點，拿拿臨換衫出門。兩點去到沙田，要食返D野先去睇戲，當時新城市底層既食肆幾乎間間都要等位，行到差唔多盡頭，見悅翠無人排隊，於是就決定食佢，唔駛等位就可以入去了 (有d人好似想等下午茶)。門口個姐姐用耳機同入門既同事話「兩位xx號台」，令我地以為有人帶位，但入到去根本無人理我地，又唔知邊張台打邊張台，一路行，問個侍應xx號台係邊，佢話前面近門口……其實唔係好肚餓，只係想搵野攝攝肚，而且因為趕住出九龍塘，所以我地決定叫個粉或飯share就算。悅翠既前菜、小食、小茶、湯羹、粉飯、點品選擇都十分多，最後我地只係叫左一個$92既明太子海鮮炒飯。個飯賣相都唔錯，不過食落就唔對路。事關佢個明太子，只係炒熟左既蟹子，明太子唔係有辣味既魚子咩？？？如果佢只係配角，問題都唔大，但作為菜名一部份，我覺得有點貨不對辨，因為我期望係有d辣味。。。。。個炒飯色水幾好，但唔夠乾身。比較好既係帶子同蝦，份量都算多，而且係略為煎過的，帶子有入口即溶既感覺。今次只係食左一樣野，感覺相當一般，不過見到佢間餐廳咁多笑臉希，望下次試多幾樣見佢真章啦。