錫記雲吞麵食

Open Now

Now Closed

以前去開深水埗，都會去食下啲懷舊嘢，理論上都係平靚正。去開大南街嗰間就唔去啦，今日到基隆街尾太子附近個間，試吓碗雲吞麵。基本裝修同其他雲吞麵舖大致相同，記得細個時啲雲吞麵舖，舖肉多數用黃色燈，小階磚綠白色花地板，開住把牛角扇，因為夏天無冷氣，食到標晒汗，唯一解熱嘅方法，就係整支細裝可樂。上次去大角嘴仲有一間咁上下，不過事隔多年，相信而家都未必喺度。因為間鋪叫雲吞麵食，所以簡簡單單叫咗碗雲吞麵，加個魚皮同豆漿。先講雲吞麵，麵底冇鹼水味但係都冇蛋麵味亦唔彈牙，同黃金商場附近間劉深記差好遠，湯底無香味。雲吞有四隻幾大粒，不過食開都係5粒細少少，唔緊要啦，最緊要係咪好食。好可惜，雲吞裏邊用嘅係雪蝦，而且無落大地魚，變咗係一般食開嘅雲吞麵舖，無乜特別。豆漿就明顯溝出嚟，飲到尾個口有少少糖精嘅酸味。反而炸魚皮就感覺新鮮好食，不過就鹹咗少少，放湯係可以接受。可能物價上升，如果以呢個價錢食就未必抵。考慮到太子區食平嘢都唔係咁易，所以用嚟填肚都係可以嘅。