韓閣 (富裕樓) (Closed)

路經荃灣，見到有間韓國餐廳韓閣幾吸引，而我另一半又話想食炸雞，咁就岩晒食呢間試下啦! 首先一入去個環境有好多韓國電影海報，而且播著耳熟能詳的Kpop，好似置身於首爾的Café一樣。講番食物，首先要介紹蟹三式石鍋飯，首先我本人好鐘意石鍋飯夠晒熱辣辣，已經有好多唔同的配菜，加上蛋汁與韓式辣醬，已經覺得好吸引。而平時主菜通常係雞肉、豬肉或牛肉等，但呢度居然用蟹為主菜! 蟹三式為松葉蟹肉、韓國蟹羔同埋蟹籽，得到三重享受，分別係蟹肉的鮮味、蟹羔的濃味及蟹籽的口感，值得推介!另一道菜就係牛油蜂蜜炸雞，上枱時已經聞到牛油的香味，而呢度的蜜糖好似唔洗錢咁，成個盤底都係蜜糖，加埋牛油，相當邪惡! 而炸雞用同部位，皮夠脆而且啖啖肉，非常滿足!最後點了韓國比較傳統的海鮮煎餅，煎餅上的海鮮料好多，分別有蝦、蜆，同埋依非比較hit的魷魚，而煎餅的皮夠薄，食落去唔會覺得落左好粉的感覺，反而食落去有點黏韌的感覺。而這裏提供了蛋黃醬及秘製韓式醬汁，可以帶出唔同的層次。其次，這裏仲有好多特色韓國食品，例如芝士岩漿炒飯、人蔘雞湯、部隊鍋、雜錦飯卷等，但因為已經食到好飽，留待下次再戰吧!