King's & Queen's 冰室 (Closed)

因為假期同家人去郊區行下，所以之後去咗西貢King & Queen冰室食晚飯。 呢度 上午同中午就係做西式餐品，夜晚就做中式餐品， 我哋點咗杏汁白肺湯、枝竹炆鵝乸、鴛鴦炒飯、椒鹽鮮魷、三色咕嚕肉、瑤柱扒豆苗。 個杏汁白肺湯好有杏仁味而且材料十足，飲完都覺得喉嚨好滋潤，而且入面啲津白好好味。 支竹炆鵝乸味道濃郁，有南乳味而且炆得好冧，支竹、冬菇好入味，啲鵝肉好滑， 店長話用鵝乸煮啲肉係比較嫩，市面上好少機會食到。 椒鹽鮮魷超香脆，而且一咬落去啲魷魚超新鮮，有啲魷魚汁流出嚟，店長話椒鹽鮮有係佢哋招牌菜之一，因為啲魷魚係每日新鮮攞返嚟。 三色咕嚕肉就係咕嚕肉另配三種醬料上， 嗰三種配料分別係甜酸醬、泰國辣醬、同埋用新鮮生果蓉打出嚟嘅生果醬，你鍾意邊隻味就自己點嗰隻味嚟食，都幾特別。 鴛鴦炒飯同瑤柱扒豆苗就一貫水準，但份量就比較大，個鳶鴦炒飯計埋都有成六碗飯，絕對抵食！