Milu Thai มิลู่ไทย (百樂中心)

Open Now

Now Closed

餐廳裝橫富有泰國色彩，牆壁採用塗鴉風格展現出潑水節同夜市熱鬧嘅情況。坐得舒服，氣氛輕鬆。喺Milu Thai食完一頓美味嘅晚餐之後，就好似用味蕾遊歷咗一次泰國。🔥火山排骨（$208） - 必試招牌菜，吸引程度100分！店員見到有小朋友，佢細心地詢問可否接受辣嘅程度，然後佢提議辣醬汁可以另外上，大人食嘅時候先淋上去。排骨非常腍，一咬即化，肉味濃郁。秘製青醬混合咗蒜蓉、辣椒、芫荽，十分特別，令人一試難忘。🍢泰式串燒（可選雞、牛、豬 $98）- 我哋點咗雞同埋牛，各3串。外面燒得焦香，入面肉質保持多汁。肉串醃得入味，泰式香料味配搭適宜。沙嗲醬有花生粒，甜甜地又好惹味。🦀青咖喱軟殼蟹配蒜蓉包 （$158）- 青咖喱味香濃，帶淡淡椰香，唔會太辣。軟殼蟹咬落每口卜卜脆，食到蟹肉嘅鮮甜，唔油膩。蒜蓉包非常香脆，牛油味濃，沾上青咖喱汁一齊食，會食唔停口。🐓泰式海南雞（半隻 $128）+油飯 - 雞皮金黃色薄薄一層，包住嫩滑肉厚嘅雞肉。油飯滿滿一大碗，飯粒飽滿軟糯。直接食，原汁原味已經好好味，但係點埋泰式醬汁之後又係另一番滋味。