為食龍 (Closed)

人氣腐皮壽司－由銅鑼灣小店搬到嚟中環SoHo樓高兩層嘅大店，食物款式更多、設計更有心思，周圍都有綠色植物裝飾同得意嘅恐龍仔，無論食物定環境都好吸引！每件腐皮壽司都好大件又足料，腐皮嘅甜味幾突出，配味道濃啲嘅刺身會更正。三文魚好肥美，撈明太子或者拼牛油果味道都好豐富；海膽三文魚子係我最鍾意嘅配搭，不過矜貴嘅材料就由價錢反映番lu🙈蟹膏好夠鮮味，少許蓋過咗甜蝦嘅味道。辣味三文魚食得多，今次就試試辣味呑拿魚－拖蘿蓉口感好綿滑，加咗辣更惹味，紫菜好重麻油香，仲有啲細細粒咬落爽脆嘅醬油蘿蔔漬物，成個組合撈飯一流，兩個share嚟食又唔會覺得好膩。除咗壽司丼物外亦有炸物小食－吉列蠔炸起好酥脆，炸粉比較厚但蠔肉鮮美，點日式蛋黃醬都唔錯。