晉皇山西刀削麵館

Open Now

Now Closed

一開始見到得幾枱食，真心驚伏，但因為附近啲餐廳都要等好耐，太肚餓就入嚟試吓，點知太令人驚喜，呢啲小店真係要好好推薦下大家。之前食過荃灣某間刀削麵， 一塊厚一塊薄，湯底好重味精，令到我好耐都冇食刀削麵，但呢間啲麵厚薄好一致，望住師傅一塊塊削落嚟，好刀工，令我好想試吓削，哈哈叫咗個上海水餃刀削麵，首先份量好多，有成四隻大水餃，水餃嘅皮唔會好厚，餡料又好足，非常唔錯。而刀削麵煮得剛剛好，好彈牙，湯底相對比較清淡，但因為我加咗口水雞啲汁落去，立即覺得配合得超好，大家都可以一試，真心正。朋友就叫咗個口水肥牛加上海菜飯，賣相一般，但味道超好，一樣大大碗飯，啲肥牛唔會煮得太老，仲索晒啲汁，唔算好辣，撈埋飯食好開胃。見小菜價錢唔貴，叫咗個口水雞同紅油抄手，前者係成隻雞髀，啲肉好滑，最重要嘅係個調味好出色，唔會一味得個辣字。後者相比剛才嘅水餃會細隻啲，因為抄手其實係雲吞，所以個皮更薄，同時亦都更加能夠索晒啲汁，不過就略嫌冇咩紅油，不過都好食既。見佢仲有涼拌刀削麵同熱拌刀削麵，都想試吓，但實在太飽了，唯有下次啦，呢間我就一定會回頭。呢啲家庭式經營嘅小店，要係天后區生存真係好難。