陸記正宗桂林米粉

Open Now

Now Closed

之前聽朋友話陸記嘅雙豬飯同白涼粉好食，個日經過就試下，店鋪並唔起眼，搵左一陣先見到。我點左朋友推介嘅絕代雙豬飯同水晶涼粉。雙豬飯真係好大碗，秘製鍋燒肉超厚切，豬皮燒得好脆，燒肉唔肥膩，肉質鮮嫩，真係啖啖肉香。而滷水豬頸肉亦整得恰到好處，滷水汁香，成功令豬頸肉更味美。兩種豬嘅唔同部位再加上入味嘅肉燥汁送飯，令人好滿足。再試埋鎮店甜品水晶涼粉，我第一次食白涼粉，感覺好新奇。透明嘅水晶涼粉對比普通黑色嘅涼粉味道較淡，無草藥味，但口感好爽，質感較軟身，有少少似啫喱，水晶涼粉配花奶，味道的確唔錯。套餐除左甜品，仲有飲品附送，最後我飲左一杯熱杏霜，依家出面已經好少有杏霜飲，再者出面更幾乎無水晶涼粉，大家有機會可以去陸記試下。我食到好飽，埋單都只係$54，絕對價格相宜，值得嘗試。