蜜雪冰城

Open Now

Now Closed

見開咗一排都咁多人買，大陸又開咗咁多分店，就諗住試下。我見附近都有人食佢個雪糕，就買咗草莓味雪王大聖代，咁我不嬲都唔會打卡，唔影相就咁食，本身都冇諗住寫食評，但食完之後覺得唔寫對唔住自己。佢個草莓味雪王大聖代就好似m記嘅士多啤梨新地，都係士多啤梨醬+雪糕，但就大杯過m記，蜜雪冰城嘅士多啤梨醬比m記嘅冇咁甜，味道好過m記少少，但蜜雪冰城個雪糕係冇咩味，我好努力好認真咁品嘗，先食到少少牛奶味，連甜味都唔多，我大為震驚，但因為我知蜜雪冰城除咗雪糕之外，仲主打飲品，心諗可能只係雪糕垃圾，所以決定俾多次機會佢，試埋個飲品，就買咗都幾多人買嘅蜜桃四季春(正常糖同冰)，我未飲之前諗住會有蜜桃味嘅糖漿，同埋見個底有啲桃肉粒同椰果，所以頭個幾啖枝飲管唔插到落底，只飲佢個茶底，飲落去冇茶香，茶味極淡，只係飲得出自己係飲緊茶，仲諗住會有蜜桃味糖漿係底，就將枝飲管插到落底諗住試下個糖漿，飲到啲椰果+桃肉粒+茶，椰果正常，桃肉粒雖然有啲桃味但係明顯浸過糖水，死甜，啲茶係0桃味0甜味，成杯野竟然連蜜桃味糖漿都冇，椰果同桃肉粒又少，雖然唔係話難飲到唔入得口，但同樣價錢係7仔求其買枝樽裝野飲都好飲過佢，完全係垃圾。