金滿都越南餐廳 (Closed)

元洲街一帶都好多餐廳，今日經過就試下呢間越南嘢。餐廳環境都冇咩特別，乾淨企理，係一般高級茶記嘅格局，都幾大，唔會同隔離檯好迫，我哋搵個卡位坐，都坐得幾舒服。我哋兩個人叫咗兩個主食，同三個小食，同一個飲品，$300有找。份量都幾好，唔會話食唔飽同食剩太多。首先講吓小食，有串燒拼盤、蒸粉包、芝士焗西蘭花。個人最推介係串燒拼盤，有豬雞牛各兩串，肉質同溫度啱啱好，咬落仲有肉汁，配埋個沙嗲汁一流，大推豬串燒同雞串燒，好好味👍🏻👍🏻。個蒸粉包熱辣辣，粉皮厚度啱啱好，唔會一咬就散晒之餘又夠包，咬落去好大陣黑椒味。而芝士焗西蘭花雖然唔係越式菜式，不過我想食😂，即叫即焗，睇落啲芝士好厚，仲有拉絲，睇得出至少用咗兩種芝士，啲西蘭花好稔，又帶有微微芝士味，唔會有漏嘅感覺。到主食部分，我哋二人叫咗一飯一麵，先講下個飯——香茅雞肉飯，鍾意撈汁嘅話呢個飯就啱晒你，雞肉配洋蔥一齊，好稔又好入味，配埋個白飯好開胃，側邊仲有啲配菜食。而另一個係燻蹄撈檬，越式燻蹄同我食開嗰啲燒味嘅燻蹄有啲唔同。佢係有啲黑椒粒，好彈牙，配埋個撈檬汁酸酸甜甜，個檬粉有唔同配料，唔同顏色同口感，擺埋一齊麵好靚。最後講下個椰青真係好正，又大又多