望月樓

Open Now

Now Closed

星期日同長輩去又一城望月樓飲茶，呢度有唔少comment話服務麻麻，呢一日去食我又覺得冇咩問題，不過去到三、四點都仲好旺場。望月樓出名食嘅點止係精緻點心，仲有環境同氛圍，所以價錢唔平，不過長輩就食得好開心☺️。蒜泥白肉薄片白肉加上薄片青瓜，口感特別，再加埋底嘅醬料味道豐富，蒜泥剁得夠細緻，溝埋一齊好好食。芙蓉海鮮芋角絕對係新鮮炸起，好酥脆，餡料豐富，芋蓉好滑，食到有帶子同埋有肉粒。雪山叉燒焗餐包正常發揮，不過同出邊嘅雪山包唔一樣，個皮唔係好脆果種，但係好薄一層。瑤柱帶子菜菌餃唔係好食到有瑤柱同帶子，反而有蝦，食落都爽口新鮮。蜜汁叉燒腸粉皮薄，好滑，入邊嘅餡料好足，有好多好多叉燒，完全冇肥肉👍🏼。望月焗豬扒飯呢個有驚喜，冇諗過飲茶有焗豬😂，有埋「望月」兩個字明顯係招牌菜。👦🏻好開心，因為係佢至愛，好足料，面頭仲要有隻煎蛋。個蕃茄汁係中式鴛鴦炒飯嘅蕃茄汁，即係類似傳說中嘅螢光汁，唔係平時快餐店焗豬嗰種鮮茄汁，冇青豆要加分，但冇菠蘿又要扣分😂。魚湯青菜缽有驚喜，因為份量十足。菜心清脆鮮嫩，加上魚湯湯底好好飲。