Give Me 5 (Closed)

朋友之前經過見到有任食牛扒，知道我都係牛魔王，所以約定我嚟呢度食飯。餐廳地方都幾大，有桌球枱同飛鏢機，可以供客人娛樂。侍應問想叫 set dinner 定任食牛扒，我哋緊係揀任食任飲放縱吓。餐廳有1個地方係自取區，可以拎湯，沙律同排隊拎牛扒。呢晚嘅湯係蘑菇忌廉湯，食到蘑菇粒，幾好飲! 沙律吧有唔同嘅菜同沙律醬汁選擇。沙律吧嘅蔬菜都新鮮，蒜蓉包香脆，配湯最夾。澳洲穀飼肉眼扒會有店員負責切，有客人想拎先會切，呢晚嘅牛扒雖然唔肥，但唔嚡，有濃濃嘅牛肉味，肉汁亦保留到，我就鍾意加埋芥末醬一齊食，唔錯! 呢晚任食嘅主菜係德國燒豬手，呢個就要同店員落單，豬手外皮鬆脆，肉就夠咸香。薯角或薯菜都係要同店員落單，薯角炸得乾身唔油膩，好味! 甜品都係自助，食完正餐，係時候食個甜品埋尾，朱古力蛋糕配牛奶布甸，朱古力蛋糕香濃。飲品都係同店員落單，如果想飲酒，都可以加錢任飲。