尚八日式燒肉店 (Closed)

香港有唔少日式燒肉專門店，呢間主打兩小時任飲任食燒肉放題，有多款前菜、炸物、豬牛雞、海鮮、串燒同飲品，值得一讚係呢度嘅服務態度，店員會細心教導客人點燒，而且環境夠闊，坐落舒適，通風系統都好好，整體感覺唔錯。前菜款色眾多，逐份叫唔怕浪費，主要用QR code落單，自助區都有幾款可以自由搭配。炸物同串燒新鮮熱辣辣，金黃酥脆，食落完全唔油膩，私心推介軟骨餃子、吉列鵪鶉蛋串、海苔多春魚、唐揚紫心香芋丸同免治雞肉串。肉類同樣有好多選擇，估唔到仲可以揀口味（鹽燒、燒汁、果味、柚子胡椒、辣味）同厚度（薄切、厚切），十分貼心。貪得意加咗個和牛試吓，果然有料到，入口即化，牛味香濃，可以一試。雖然呢度主打牛肉，但係海鮮都唔輸蝕，特別推薦佢哋嘅海蝦，大大隻，爽口彈牙，鮮甜美味。仲有魷魚筒、鯖魚、廣島蠔、帆立貝同清酒煮蜆，記得要落埋香草牛油落去燒，雖然好邪惡，但真係會令到整體味道昇華咗去另一個層次！如果唔夠飽嘅都可以叫埋佢哋嘅飯同烏冬，總共有成八款選擇。最後當然唔少得以甜品作結，有自家製牛乳凍、Bulla雪條或Victoria雪糕。飲品方面相對比較少，都係汽水同茶為主，亦可以加錢要酒精類，出邊嘅麵豉湯都唔錯，