柳氏家 (Closed)

前兩日去一個住荃灣西嘅朋友屋企探佢隻貓貓，上去之前我地一齊去左荃灣廣場呢間有鐵板雞又有烤肉任食嘅餐廳食lunch。Lunch每人$158加一就有90分鐘任食，食物選擇都唔少。點完鐵板雞同烤肉之後就出去夾下熟食去食住先。熟食有魚糕湯、炒高麗菜同埋炒粉絲等等。朋友最鍾意就係食炒粉絲，唔太油，都幾好。有任食嘅鐵板雞係呢間餐廳同其他韓燒唔同嘅地方。鐵板雞有三款味道，分別係柳氏家辣炒雞、蜜糖味增炒雞同埋烤肉味炒雞。我地淨係點左頭兩款，兩款都幾好味，除左雞之外仲會有啲菜、大蔥同埋年糕喺入面。柳氏家辣炒雞辣辣地好惹味，蜜糖味增炒雞就甜甜地，我就比較鍾意食辣嘅炒雞。烤肉方面有牛、豬同埋海鮮。我同朋友都一致認為豚梅肉最好味，因為醃得入味，燒完都幾滑嫩唔會韌。有烤肉汁同辛味烤肉汁嘅揀，烤肉汁就甜甜地，辛味烤肉汁就濃味少少。出面仲有得自己夾其他燒烤配料，朋友最鍾意就係芝士年糕同埋蕃薯年糕，燒一陣就食得！仲可以點炸雞食，係逐件逐件咁點嘅，新鮮炸起熱辣辣。有甜辣炸雞、大蔥炸雞同蜜糖芥末炸雞。不過我覺得啲醬汁就比得多左啲。最後可以自己出去裝雪糕食，不過我地太飽就冇食到啦。