Video
Read full review
2013-09-12
31 views
早前晌灣仔曼谷泰菜食飯，偶爾見到斜對面樓上食肆有個小陽台，感覺幾別緻，不過當時都喺「霎吓眼」睇睇，未有太刻意細望。再睇睇側邊餐廳個招牌「Jack's Terrazza」，咪好似有一間晌三里屯，事後得知原來舊鋪搬咗過嚟，估唔到事隔兩個月，就有幸嚟到依個「杰克小陽台」嚟試菜，真喺多謝食友嘅引薦。其實，意大利菜一向都喺小弟喜愛嘅菜系之一，今晚仲要美酒配佳餚，實在喺一個愉快嘅晚上。餐廳位處駱克道尾一街角，離地鐵又唔遠，旺中帶靜。一進店內，幽暗嘅燈光令環境頗富情調，跟街外嘅五光十色相映成趣，個人覺得非常適合情侶嚟晚飯慶祝，又或一班人嚟慶生日。全店分幾個用餐區域，棗紅色皮櫈皮梳化椅，配紅白格仔布餐枱，頗有古舊味道，枱上餐酒杯、一整套餐具、蠟燭燈，樣樣都做得認真細微。而一眾都認為最別緻莫過於近窗嘅鞦韆椅，懸掛嘅卡位唔喺得個樣，可以搖搖盪盪，感覺寫意呀！叫得Terrazza，點都要保留番有個小陽台，餐廳對街一角就喺喇，依家天氣有少少熱，感覺可能差啲啲，點知原來可以放下透明膠簾，再開少少冷氣，一樣變得舒服涼快喎；當然，秋涼時節，配合寧靜街景，就更加稱心愜意。是晚安排咗8道菜式，由前菜、沙律、米飯、主菜至
餐廳位處駱克道尾一街角，離地鐵又唔遠，旺中帶靜。一進店內，幽暗嘅燈光令環境頗富情調，跟街外嘅五光十色相映成趣，個人覺得非常適合情侶嚟晚飯慶祝，又或一班人嚟慶生日。全店分幾個用餐區域，棗紅色皮櫈皮梳化椅，配紅白格仔布餐枱，頗有古舊味道，枱上餐酒杯、一整套餐具、蠟燭燈，樣樣都做得認真細微。而一眾都認為最別緻莫過於近窗嘅鞦韆椅，懸掛嘅卡位唔喺得個樣，可以搖搖盪盪，感覺寫意呀！叫得Terrazza，點都要保留番有個小陽台，餐廳對街一角就喺喇，依家天氣有少少熱，感覺可能差啲啲，點知原來可以放下透明膠簾，再開少少冷氣，一樣變得舒服涼快喎；當然，秋涼時節，配合寧靜街景，就更加稱心愜意。
是晚安排咗8道菜式，由前菜、沙律、米飯、主菜至甜品，都感受到每道菜都喺大廚心血，選取優質食材，配以精良醬汁，十分令人回味！麵包籃
食大部份西餐嘅指定動作，食意菜就更加唔少得。一小籃麵包，有數個小圓包及意大利麵包棒，算唔上好有特色，但微暖，香軟，為今晚豐富嘅意菜打開序幕。
露筍軟芝士風乾牛肉卷 $98個人覺得依個風乾牛肉卷配搭幾特別，小弟亦幾鍾意，以意大利風乾牛肉捲住羊奶芝士及美國鮮露筍，鹹香柔軟嘅牛肉之下，襯托出帶微羶嘅羊奶芝士及爽脆嘅鮮露筍，滋味三重奏。牛肉卷底下伴以榛子醬，好香榛子味，味道挺特別，不過跟牛肉卷唔算太夾。另外，配菜嘅沙律菜、車厘茄、黑橄欖、雅枝竹，下咗意大利黑醋，真喺色香味俱備，尤其燒香過嘅雅枝竹，帶點甘，帶點脆，幾有心思嘅配搭。
地中海快燒生吞拿魚柳伴火箭菜車厘茄沙津 $138雖然個菜式名好長，但實際做法唔花巧。新鮮挪威吞拿魚柳整件輕煎，再蘸香草及黑椒碎，然後薄切上碟，由於只喺輕煎過，有啲近乎食魚生嘅感覺，味道很鮮甜。配菜喺火箭菜及車厘茄，以檸檬、香草、橄欖油所做嘅沙津汁，再加埋意大利黑醋，個沙津底食起嚟很清新。
雜錦海鮮龍蝦忌廉汁燴意大利飯 $178個燴意大利飯絕對喺高水準之作，一上枱已好香龍蝦味，飯粒煙韌有咬口，浸淫鮮龍蝦及忌廉打成嘅醬汁，非常之惹味，兼且份量啱啱好。一小啖白酒，一小口意大利飯，令人津津樂道。而海鮮陣容亦好有睇頭，有大蜆、青口、魷魚、鮮蝦、帶子，海鮮甚具質素，鮮甜味美，還要一人一份，食得十分滿足！
檸檬雪葩間場嘅雪葩，甚有食意菜嘅慣常次序。據講，檸檬喺選用嚟自意大利西西里嘅，貪其夠大又皮薄，挖肉做成檸檬雪葩，再釀番入檸檬皮內，加少少忌廉唧花及士多啤梨伴碟，令人睇見都感覺清爽。雪葩入口芳香微酸，晌仲夏更感冰涼，讓味蕾清新一下，為使稍後食主菜時更能品嚐其真味。
香煎原條新西蘭龍脷魚配青檸牛油汁．烤香草新薯及鮮菜 $188主菜共預備咗3款，有魚，有家禽，有肉，可見店方都希望讓大家試到唔同種類食材。打頭陣喺香煎原條新西蘭龍脷魚，平時食龍脷柳食得多，今回原條龍脷魚香煎，雖然魚嘅賣相唔喺好靚，但肉質非常細嫩，外層亦十分焦香，唧下鮮檸檬汁，感覺無咁油膩，而檸檬預先燒過，細節位一啲唔馬虎。但整碟龍脷魚最大驚喜，小弟就認為喺個青檸牛油汁，味道油香鮮活，蘸魚一流。
香草芝士烤春雞 $188單睇外表，真喺察覺唔到有咩特色，但細味之下，可以話喺平凡中嘅不平凡。春雞肉質鮮嫩柔滑，據介紹原來喺以法國野雞仔入饌，揀選一磅多少少重嘅，再以香草醃勻雞隻，先煎封鎖肉汁，後加上巴馬臣芝士烤焗，無怪乎咬落皮脆而肉汁豐盈，芝香又惹味。最有趣喺烤春雞上面撒下數片炸紫薯薄片，粉粉甜甜。至於伴碟嘅烤香草新薯及時蔬，亦香口好味，唔好輕易錯過。
蕃茄紅酒汁燴牛仔膝 $228最後一道主菜「燴牛仔膝」，唔單只有牛仔膝，仲有牛骨髓添，大可補充一下骨膠原。牛仔膝頗為大件，利用紅酒及蕃茄製成醬汁再跟牛仔膝燴焗4小時，可謂心機菜，絕對急唔嚟，牛仔膝燴得軟腍鬆化，當中又帶有少少牛筋及脂肪，令口感有咬口但唔會覺韌，有油香又唔會覺膩；再者，醬汁味道酸香醇厚，非常濃郁，令牛仔膝好入味。至於配上嘅栗米餅，外型好似西多士，香香脆脆，餅心軟綿，蘸蕃茄紅酒汁，另有一番風味。
甜品拼盤 $188小弟一向好甜品，所以見個甜品拼盤咁大份咁豐富，加上同枱部份食友對甜品一般，間接益咗小弟食多兩件。甜品有傳統嘅意大利芝士蛋糕，大路嘅藍莓芝士餅，仲有較為特別嘅特式意大利朱古力芒果雪糕。意大利芝士蛋糕做得不俗，雖然唔喺用手指餅，但蛋糕有咖啡酒香，而馬卡風芝士清淡幼滑；藍莓芝士餅嘅牛油消化餅底夠薄，芝士味夠濃，藍莓果肉又夠香；而特式意大利朱古力芒果雪糕當中嘅芒果味未有期望中咁突出，但雪糕質感就的確滑溜。
餐酒上文話明今晚喺美酒配佳餚，為著不同菜式，總共試咗4款餐酒，包括襯前菜、沙律嘅白酒Pinot Grigio 2011 (Italy)，襯意大利飯嘅白酒Chardonnay 2011 (South Australia)，配主菜嘅紅酒Shiraz 2012 (South Australia)，以及伴甜品嘅白酒Moscato d’asti 2008 (Italy)。識我嘅人都知小弟唔好酒，淺嚐無妨，加上同枱食友有品酒師，評酒嘅重任當然留俾人做，不過，都想寫番兩句個人體會。平時甜品時段，都喺配咖啡多，今次改以襯Dessert Wine，感覺真喺幾特別，Moscato d’asti酒精度頗低，且帶甜味，極之易入口，搭上各款甜品，有一種幾融和嘅感覺。
對「杰克」整體嘅印象，就正如食評個標題「優材良醬」，店方晌食材嘅揀選及醬汁嘅調製，都好有心思，無怪乎大家都食得稱心滿意，小弟就更感份外滿足。
Post
