沙田頭火鍋 (Closed)

餐廳喺旺角砵蘭街，裝潢幾有香港地道風味。湯底都唔少選擇，我哋簡單啲揀咗【特製沙爹湯鍋】，睇色水已經知道夠濃，滾起飲啖有香濃花生味，係好出色嘅沙爹鍋。【花白蜆】都幾大隻，熟咗後都無縮水，鮮味十足。【四寶餃】有蛋餃、韮菜餃、水餃、雲呑；以為蛋餃入面係豬肉，原來係鮮蝦；雲吞裡面嘅蝦都幾大隻；韮菜餃嘅饀就好多韮菜，好有清香味道。丸類同樣出色【墨魚丸】【鮮蝦丸】【鯪魚丸】【牛丸】全部都係手打，口感特別彈牙。我最鍾意牛丸同鮮蝦丸，味道濃郁。【豬皮】好厚好大塊，索晒啲沙爹汁，更加好食。【萵筍】味道香甜，口感爽脆。【安格斯牛小排】滿佈雪花紋，肉質嫩滑，入口滿滿肉香油香；起雙飛切到好大片，所以食起嚟好滿足。【雜菜拼盤】有油麥菜、金菇、生菜、娃娃菜，食新鮮蔬菜，均衡營養。食咗咁多，樣樣都幾高質，隔嚟枱幾位叔叔仲隊住啤食到好開心，的確係同朋友暢聚好地方。