博多拉麵別天神 (Closed)

心血來潮想食拉麵，先知亞士厘道呢到有間拉麵店！見價錢裝修都ok，而且都幾多人，決定試下！一入門口就有個自助食券機俾你選擇想要啲咩拉麵，之後將張票比店員就OK啦，非常方便！而且好有日本小店嘅feel~我哋兩個人揀咗個別天神套餐再加一碗蝦味噌湯面。別天神套餐另有沙律和餃子！呢度走自助式，茶水可以自己倒，和醬油都可以自己調配。沙律唔好見佢細細份，其實啲龍蝦都幾足料，味道都唔錯。餃子熱騰騰，入邊亦都有肉汁。別天神拉麵其實即係豚骨拉麵，個湯底超正！真心就咁飲都冇問題唔會口渴，係好濃郁嘅豬骨湯。糖心蛋都好好食，半生熟，好滑身。拉麵有口感，唔會太軟身！蝦味噌豚骨拉麵呢個反而豚骨湯底味冇咁出，但一樣都係好濃郁。配料一樣好豐富，而且仲多咗粟米同埋蝦米。蝦米好香，同頭先嗰碗係另一番味道。個人比較鍾意豚骨拉麵🤤總括來講，拉麵質素唔錯，而且尖沙咀來講價錢唔算貴，上菜又快，下次經過會再試。