千樂燒味餐室 (Closed)

2個人出開銅鑼灣買野，路過見到燒臘舖門面光鮮，入面又幾整潔，就入咗去食飯醫肚啦。點咗嘅雙拼嘅叉燒拼燒鵝，份量都好大碟，夠2個人share嚟食。加了一碟油菜同埋2碗白飯，啱啱好。叉燒口感軟腍，唔會韌又唔會乾，有蜜汁香味，帶出少少焦香味道，有半肥瘦味道，不過就無咁多脂肪，食多幾舊都冇乜罪惡感。燒鵝燒得好香，唔知有無用荔枝柴啦，我就唔係好識分，但係味道就好甘香，見到皮上面嘅燒烤紋就知道個皮係燒得好香脆，一咬即刻滿口油香，鵝肉尚算嫩，咬落唔會好韌。呢度燒味質素真係唔錯，有機會再去銅鑼灣就斬料返屋企加餸。