京.花朝 (Closed)

通常去到銅鑼灣諗唔到食咩，就會去耀華街百樂中心度搵吓有咩食。呢度長期都排長龍，排隊嘅時候我哋最後決定食中菜，搵左呢間京花朝。一入到去好有高級私房菜感覺，以為價錢會好貴，點知一睇餐牌原來好抵食！我哋要咗一個二人套餐，冷盤方面可以自選兩個，我哋首先要咗個雞絲粉皮。1無論係雞肉丶青瓜絲丶定係麻醬，都十分足料！特別欣賞麻醬既味道，調教得好香濃，好好食！另外要左碟涼拌海蜇皮，海蜇十分爽口，加左少少麻油調味，好開胃。然後到原盅燉湯。燉湯熱辣辣，而且非常足料，有菌類，杞子，圓肉，瘦肉，火腿，南北杏等等，清甜又滋潤。到主菜部分同樣可以自選兩款，首先揀左賽螃蟹。白雪雪既蛋白真係十分嫩滑，而且入面有同樣嫩滑既魚柳粒，面頭又加左肉鬆，增加口感同層次，加少少醋調味已經夠。另一主菜係中菜必食既鳳梨咕嚕肉。呢度既咕嚕肉真係可以得超高分！個汁酸甜度，稀稠度都恰到好處。而且肉炸得夠脆夠鬆化又唔厚粉，啖啖肉，用黎撈比較清淡既蛋白炒飯真係一流。最後仲有拔絲香蕉做甜品。略嫌粉醬有少少厚，但味道唔會好甜，仍然都係好好食。呢個餐for 2個人真係足夠有餘，食物水準超級高，環境又舒服，重點係完全唔貴，真係好推介。