鮨政 (Closed)

今天女朋友中午黎搵我吃飯，我帶咗佢嚟呢間食過兩次都印象深刻嘅日式餐廳。印象深刻嘅原因第一係每次嚟到都會蕩失路，因為佢個位實在係太隱蔽，第二係佢啲嘢食真係好高質，性價比好高。我哋叫咗兩個午餐，分別係壽司拼盤同埋鰻魚飯。兩個午餐都附送沙律、蒸蛋同埋麵豉湯。保證食到飽！壽司拼盤一共有10件壽司，師傅喺每件壽司入邊都擺好芥末，非常正宗嘅日本做法，特別鍾意食件帶子壽司、同埋三文魚腩好肥美。鰻魚飯味道都係非常之好，鰻魚汁甜道啱啱好，鰻魚嘅口感都唔錯，唔會擺入口即刻散晒。總括來講，喺中上環來講有咁嘅日本餐廳用咁嘅價錢食得到咁嘅質素都係相當之值得一試。